In Gott sien Hann
Siet lange Tied al ligg disset Bild op mienen Schriefdisch. Gegen de Schwerkraff hoolt sik dor een lütt Marienkäfer an de Ünnersiet vun een Blatt fass. Un dat schient, as wenn em dat keen groote Möög mookt. Op Hoochdüütsch steiht een Satz vun Sören Kahl doröber: Gott hoolt di in sien Hann, ok wenn de Welt Kopp steiht.
Een schönet Bild un Wöör, de Moot mookt. Ober, ist da so? Kann ik dat marken, wat Gott bi mi is, wenn’t wörklich op ankümmt? Wenn dat op un dool geiht in mien Leben, in disse Welt, kann ik dat marken, wat Gott mi fasthoolt?
In disse Doogen, wo de Anschläge vun Brüssel uns vör Oogen föhrt, wo veel Hass Minschen in sik dreegen köönt, dor hölpt mi dat Bild. Sölben wenn allens üm di rüm wat anners segg: De Botschaff vun Gott sien Leev un Neegde to uns blifft. De Botschaff vun Jesus Christus, de opstohn is vun de Doden un de seggt hett: „Selig sünd de Minschen, de fründli un sinni mit de annern ümgoht – se sett sik toletzt dörch in de Welt!“, oder „Selig sünd de Minschen, de Freden holt un mookt – se ward Gott sien Kinner nömt warrn“, de giff mi Kraff.
An’n End hebbt nich de de Bobenhand, de för Hass brüllen doot, sünnern de goode Botschaff vun Gott siehn Wohrn un sein Leev. Dat Totruun in den Gott, de ok den Dood öberwinnen deit, is een Kraff, de de Seel as een warme Hand fasthoolt. Ok wenn Hass un Unfreden de Welt ut de Angeln heben wöllt: Dien Seel is borgen in Gott un blifft dat ok. Christus sien Opstohn vun de Doden wiest uns den Weg: Den Weg opeenanner to un nicht vuneenanner weg. Den Weg vun een Freeden, de di nix un nüms nehmen kann.
Osterdoogen in dissen Freden un ünner Gott sien Segen wünscht
Helmut Nagel, Pastor in Haseldörp un Heteln.
- - -
Das Osterwort auf Hochdeutsch (PDF)
- - -
Und wenn Sie einen plattdeutschen Gottesdienst an den Ostertagen besuchen möchten, haben wir zwei Vorschläge für Sie:
> Gottesdienst am Ostermontag in Hetlingen
> Gottesdienst am Ostermontag in Reinbek